Lo amogetswe mo Constitution Hill, legae la Kgotlatshekelo ya Molaotheo wa Aforika Borwa.
Kgotlatshekelo ya Molaotheo e agilwe mo setsheng sa Kgolegelo ya Old Fort, e e itsegeng thata jaaka Number Four. Ka jalo botlhoko jwa paka e e fetileng bo fetoletswe go nna tsholofelo ya isago.
Constitution Hill ke letshwao la tirisano mo demokerasing ya rona e ntšhwa. Maikaelelo a Molaotheo a batla gore rona rotlhe re dire mmogo go a fitlhelela. Re lo laletsa go nna le seabe mo go tiiseng demokerasi e e ikemiseditseng go fitlhelela maikaelelo le boleng jwa Molaotheo wa rona.
Kgotlatshekelo ya Molaotheo wa Aforika Borwa
Mopitlwe 2004
Mogogoro o ke masalela a Lephata la Batshwarwa ba ba letileng Tsheko wa Moago wa Kgolegelo ya Old Fort. E agilwe ka 1926, mme ya thubiwa ka 2003 go sutela Kgotlatshekelo e. Go somaretswe megogoro e le mene, e mebedi ya yona e Agaletsweng mo moagong wa Kgotlatshekelo ya Molaotheo. Ditena tsotlhe tsa moago o o thubilweng di ne tsa tlhokomelwa, mme tse dingwe tsa tsona di dirisitswe mo kagong ya Kgotlatshekelo e ntšhwa.
Kamotshana e e ka fa tlase ga mogogoro e ne e dirisediwa go tshola ditlhopha tse ditona tsa bagolegwa ba sepolotiki, jaaka Bagolegwa ba Boepapuso ka 1956 le bao ba tshwerweng mo Dikhuduegong tsa Soweto ka 1976.
Diketekete tsa bagolegwa ba banna ba bantsho ba ba neng ba letile go sekisiwa ba ne ba gwantisiwa go tlhatloga le go fologa direpodi tse. Bone ba ne ba akaretsa bagolegwa ba ba neng ba tshwaretswe bosenyi jo bo tlwaelegileng le jwa sepolotiki. Bontsi jwa bone e ne e le batho ba ba tshwaretsweng dipasa, ba "melato" ya bone e neng e le gore e ne e le kgatlhanong le melao ya bomorafe ya motsi oo.
